Ma, drie kinders verdwyn saam
Die familie van ʼn Pretoria-ma is rasend van bekommernis oor haar en haar drie kinders se veiligheid nadat hulle Woensdag spoorloos verdwyn het. Hulle vra die publiek om hulle sover moontlik te help met die opsporing.
André Putter, ʼn privaat speurder wat aangestel is om na haar te soek, het Donderdag aan Maroela Media gesê die ma, Jenna Koeberg (31), en haar drie kinders, Julio (12), Hannah (10) en Gabriella (4), is Woensdag vir die laaste keer omstreeks 09:00 in Moreletapark in die ooste van die stad gesien.
“Sy is die bestuurder van ʼn plaaslike pizza-restaurant wat aan haar man, Sean (31), behoort. Hulle is die laaste keer glo deur Jenna se persoonlike assistent gesien. Daar word vermoed dat sy haar assistent gevra het om hulle langs die pad af te laai,” het Putter gesê. Putter het gesê die familie vrees vir haar en die kinders se veiligheid. “Sy het nie haar motor, beursie, selfoon of bankkaarte by haar nie. Die moontlikheid bestaan wel dat sy kontant by haar gehad het.” Sean het haar en die kinders Woensdag as vermis aangemeld by die Garsfontein-polisiestasie. Putter het ʼn beroep op die publiek gedoen om inligting oor die saak te versprei, of na vore te kom as hulle weet waar Jenna en haar kinders hulle moontlik bevind. Bel Putter by 084 485 6448.
http://maroelamedia.co.za/blog/nuus/sa-nuus/ma-drie-kinders-verdwyn-saam/
#StopWhiteGenocideInSA
