Die polisie benodig hulp van die publiek om ʼn jong wit vrou, in haar 20’s, te identifiseer nadat haar liggaam twee weke gelede buite Pretoria gevind is. Konst. Tumisang Moloto, polisiewoordvoerder, het Woensdag aan Maroela Media gesê die vrou se liggaam is op 13 September op die oewer van ʼn rivier in die omgewing van die Hennops Pridekaravaanpark, langs die R511-pad noordwes van Centurion, gevind.
Die Erasmia-polisie ondersoek ʼn saak van moord. Die polisie se slagofferidentifikasiesentrum het intussen ʼn profiel van die slagoffer opgestel om aan die publiek te verskaf in ʼn poging om haar identiteit te bepaal en die polisie in hul ondersoek by te staan. Moloto het gesê ʼn nadoodse ondersoek is gedoen en die polisie wag nog vir die uitslae om te bepaal hoe die vrou dood is. “Sy het sigbare merke aan haar liggaam gehad, maar die oorsaak van haar dood kan nog nie bevestig word voordat die uitslae van die nadoodse ondersoek bekend is nie,” het Moloto bygevoeg. Mense met inligting oor wie die vrou mag wees, word versoek om die ondersoekbeampte, konst. Moima, by 083 317 7150 of die Erasmia-polisie by 012 370 1777 te bel.
http://maroelamedia.co.za/blog/nuus/sa-nuus/jong-vrou-se-lyk-in-rivier-buite-pta-gestort-polisie-vra-hulp/
Also read:
Body dumped in Hennops Pride Caravan Park
#MURDER
