Twee mans is in hegtenis geneem enkele minute nadat hulle by ʼn Johannesburgse huis ingebreek en ʼn bejaarde man met ʼn skroewedraaier gesteek het.
Ao. Xoli Mbele, woordvoerder van die polisie, het gesê vier mans het Vrydag omstreeks 12:00 by ʼn huis in Moffat View ingebreek. “Die verdagtes het oor die heining gespring en ʼn 84-jarige man in die kombuis aangeval. Hulle het hom met ʼn skroewedraaier gesteek en erg aangerand, voordat hulle sy hande en voete met kabelbinders vasgebind het,” het Mbele gesê. Die rowers het die huis omgekeer, glo opsoek na geld. Hulle het met ʼn houer vol juweliersware en ander items gevlug. Polisiebeamptes op roetine misdaadbekampingsdiens het gesien hoe die vier mans van die toneel af weghardloop en het versterkings ontbied. “Twee verdagtes, onderskeidelik 27 en 40 jaar oud, is gevang en in hegtenis geneem. Twee ongelisensieerde vuurwapens, ʼn skroewedraaier en die juweliershouer is in hul besit gevind,” het Mbele gesê. Die ander twee verdagtes kon daarin slaag om weg te kom en is steeds soek. “Die bejaarde man is na ʼn hospitaal gehaas,” het hy gesê. Die twee verdagtes sal binnekort in die Johannesburg-landdroshof verskyn op aanklagte van huisbraak en die onwettige besit van vuurwapens en ammunisie.
http://maroelamedia.co.za/blog/nuus/sa-nuus/twee-vas-wat-bejaarde-met-skroewedraaier-steek/
ATTACK
#StopWhiteGenocideInSA
